Tobba Marinós og Yrsa keppa í Útsvari

Fjölmiðlakonan og rithöfundurinn Þorbjörg Marinósdóttir hefur staðfest þátttöku sína í Útsvari, spurningaþætti milli sveitarfélaga sem er að hefja göngu sína fjórða árið í röð í Ríkisjónvarpinu. Þorbjörg, eða Tobba Marinós eins og hún er gjarnan kölluð, keppir fyrir hönd sveitarfélags síns, Kópavogs, í spurningaleiknum sívinsæla og mun eflaust reynast liðsstyrkur fyrir sitt lið enda með puttana á púlsinum á flestu sem er að gerast í samfélaginu í dag.

Aðstandendur Útsvars eru þessa dagana að leggja lokahönd á liðaskipan í þáttunum og eiga áhorfendur eftir að sjá nokkur ný og óþekkt andlit berjast sín á milli í vetur. Til að mynda verða tvær konur í liði Ísafjarðarbæjar en það er víst erfiðara að fá konur til að taka þátt í spurningaþættinum en karlpeninginn og er mikil ánægju með það hjá RÚV hversu margar konur taka þátt að þessu sinni.

Yrsa Sigurðardóttir rithöfundur ætlar að taka þátt í fyrsta sinn fyrir hönd Seltjarnarness og Kolfinna Baldvinsdóttir ætlar einnig að spreyta sig á skjánum. Vilhjálmur Bjarnasson og Svanhildur Hólm ætla að taka upp forna frægð og keppa aftur fyrir hönd Garðabæjar og Reykjavíkur þetta árið en þau mættust einmitt í úrslitum í fyrra þar sem lið Garðabæjar undir forystu Vilhjáms fór með sigur af hólmi. - áp