Hrossakjötsnám í sláturhúsi

Leikmunadeild Þjóðleikhússins hefur verið önnum kafin að undanförnu við að útbúa gervihrossakjöt fyrir verkið Finnski hesturinn sem verður frumsýnt 15. október.

„Við erum búin að vera að stúdera hrossakjötið. Leikmunadeildin fór í heimsókn í sláturhús á Selfossi. Þar var stöðvarstjórinn svo almennilegur að leyfa okkur að skoða,“ segir Ásta Sigríður Jónsdóttir úr leikmunadeildinni en henni til halds og trausts hefur verið Högni Sigurþórsson. „Við fengum að spjalla aðeins við fólkið og fengum að sjá hvernig þetta er unnið.“

Hún segir að vinnan við gervikjötið hafi gengið mjög vel og verið virkilega skemmtileg. Notað hafi verið sílikon við „framleiðsluna“ en í leikritinu drepast fimm hestar. Því þurfa leikararnir að meðhöndla kjötið í mörgum atriðum. Ásta viðurkennir að vinnan hafi verið fremur subbuleg. „En það er nú ýmislegt subbulegt sem maður gerir í þessu starfi.“

Finnski hesturinn gerist á bóndabæ í afskekktri sveit í Finnlandi og með helstu hlutverk fara Ólafía Hrönn Jónsdóttir og Kjartan Guðjónsson. -fb