Milla lofar góðum Skyttum

Eins og komið hefur fram í fjölmiðlum stendur til að mynda, enn á ný, ævintýrið um skytturnar D‘Artagnan, Atos, Portos og Aramis sem Alexander Dumas gerði ódauðlega í samnefndri bók. Þeir Matthew Macfadyen, Logan Lerman, Luke Evans og Ray Stevenson fá það erfiða hlutskipti að lyfta sverði og hrópa: „Einn fyrir alla og allir fyrir einn.“ Þótt þeir séu vissulega ungir og óreyndir verða þeir dyggilega studdir af Óskarsverðlaunahafanum Christoph Waltz og Orlando Bloom auk Millu Jovovich.

Milla sagði við fjölmiðla nýverið að þessi Skyttumynd væri ekki í líkingu við neitt sem fólk hefði áður séð. „Við höfum verið í mjög stífum æfingum og búin að prófa heilan helling af búningum og hárgreiðslum. Þetta mun líta stórkostlega út,“ segir Milla sem leikur M‘lady De Winter í myndinni. Milla bætir því við að áhættuatriðin eigi eftir að koma fólki í opna skjöldu. „Mér er það til efs að fólk hafi einhvern tímann séð konu í korseletti í jafnmiklum loftköstum og í þessari mynd. Þetta á eftir að vekja mikla athygli,“ bætir Milla við en myndin verður væntanlega frumsýnd á næsta ári.