Safnar fyrir skólagjöldum

„Námið er svo dýrt að námslánið dugar ekki fyrir skólagjöldunum, það er nú bara svo einfalt,“ segir Daníel Smári Hallgrímsson en eins og Fréttablaðið greindi frá fyrr í sumar komst hann inn í þekktan tónlistarskóla í Los Angeles þar sem hann mun leggja stund á nám í gítarsmíði. Námið er dýrt og Lánasjóður íslenskra námsmanna dekkar ekki allan kostnaðinn sem náminu fylgir.

„LÍN er að lána eins mikið og það hefur leyfi fyrir og þó að ég sé búinn að vera að safna í allt sumar dugar það ekki til,“ segir Daníel og bætir við að hann vanti nokkra hundrað þúsund kalla áður en hann geti haldið af stað. Daníel hefur því brugðið á það ráð að skipuleggja styrktartónleika sem fara fram í kvöld á skemmtistaðnum Venue og byrja klukkan 21.30. Það kostar 1.000 krónur inn og ágóðinn af tónleikunum rennur beint í skólasjóð Daníels.

„Mér fannst þetta sniðug hugmynd þar sem ég þekki fullt af yndislegu fólki og hljómsveitum sem eru til í að hjálpa mér að láta þennan draum rætast,“ segir Daníel en hljómsveitirnar sem koma fram í kvöld eru MOY, Blæti, Two Tickets to Japan, Mikado og For a Minor Reflection. Daníel er einmitt bassaleikari í hljómsveitinni Mikado en hann stefnir á að fara utan 19. september. - áp