Jimmy Jump ætlar að hlaupa inn á leik á HM

Spánverjinn sem gerði allt vitlaust í Eurovision er nú kominn í stellingar til að hlaupa inn á leik á HM í Suður-Afríku. Jimmy hefur meðal annars hlaupið inn á úrslitaleik Portúgala og Grikkja á EM árið 2004.

Samkvæmt síðunni Worldcup2010now.com sagði hann í viðtali að hann ætlaði að hlaupa inn á leik í Suður-Afríku. Hann hafði áður gefið þetta í skyn á Facebook-síðu sinni. Þeir sem fylgdust með Facebook-síðu hans dagana fyrir Eurovision grunaði einmitt að hann myndi trufla þá keppni en þá birti hann myndir af sér í Osló.

Þá hefur Jimmy einnig gefið út lagið Jimmy Jump Anthem þar sem hann syngur meðal annars „From Oslo to Johannesburg". Tekið skal fram að lagið er hrikalega lélegt.

Jimmy heitir réttu nafni Jaume Marquet Cot og er fasteignasali frá Katalóníu á Spáni. Hann hefur truflað fjöldan allan af íþróttaviðburðum síðastliðinn áratug. Hann hljóp síðan inn á sviðið í spænska laginu í Eurovision og vakti þannig gríðarlega athygli út um allan heim. Hér er hægt að sjá spænska lagið. Jimmy kemur inná eftir 1:10 og er á sviðinu í tuttugu sekúndur.

Jimmy var handtekinn en Norðmenn höfðu samt húmor fyrir uppátæki hans. Hann var meðal annars fenginn til að leika í norskri auglýsingu fyrir Norges Automaten. Auglýsinguna má sjá hér.

Í myndasafninu fyrir neðan má sjá truflanir Jimmy í gegnum árin.