Rússneska ofurfyrirsætan skartar íslenskum mosa

„Ég verð eiginlega að ná sambandi við hana og fá senda mynd af henni með hálsmenið mitt," segir Hafsteinn Júlíusson, vöruhönnuður.

Ofurfyrirsætan Natalia Vodianova festi kaup á hálmeninu hans, Growing Jewelry, þegar hún var stödd hér á landi í byrjun mánaðarins. Eins og Fréttablaðið greindi frá var Vodianova stödd hér á landi fyrir tveimur vikum ásamt ónafngreindum manni og féllu þau bæði fyrir mosahálsmenunum hans Hafsteins.

„Ég var að koma til landsins og fékk þá þessar gleðifregnir frá starfstúlkunum í Kraumi þar sem skartgripirnir eru seldir," segir Hafsteinn. „Maðurinn sem var með fyrirsætunni keypti víst hálsmenið fyrir Vodianovu." Ekki er vitað hver förunautur ofurfyrirsætunnar var á meðan dvöl hennar í Reykjavík stóð yfir, en hún gift breska auðkýfingnum Justin Trevor Berkeley Portman.

Skartgripirnir umræddu eru silfurhálsmen og hringar skreyttir íslenskum mosa og hafa þeir fengið mikla athygli. Hafsteinn, sem er búsettur í Mílanó, er búinn að koma á fót fyrirtækinu HAF by Hafsteinn Júlíusson þar sem hann er meðal annars með tölvutöskur, pappírssnakk, gosdrykk og næringardisk í burðarliðnum. „Ég er staddur hér á landi til að fylgja þessum vörum eftir og koma þeim í framleiðslu og sölu hér á landi," segir hann.

Mosavöxnu skartgripirnir og fleiri vörur Hafsteins hafa vakið mikla athygli í erlendri pressu og segist hann vera að selja þá út um allan heim. „Ég er að fá margar pantarnir frá löndum eins og Íran og Aserbadsjan sem er frekar fyndið, en mjög skemmtilegt að það sé fólk sem skartar íslenskum mosa í þessu löndum," segir Hafsteinn en skartgripirnir eru seldir í eins konar mínígróðurhúsi og þurfa eigendurnir að sjá til þess að mosinn haldi sér grænum og fínum.

„Ég fæ fjöldann allan af pósti frá viðskiptavinum sem láta mig vita hvernig gengur að halda mosanum við. Fínt að geta haldið tengslum við vöruna sína og vita hvernig hún hefur það," segir Hafsteinn hlæjandi en hann sendir stundum áfyllingu í skartgripina og það er spurning hvort rússneska ofurfyrirsætan eigi eftir að rækta mosann sinn eða biðja um áfyllingu hjá Hafsteini. alfrun@frettabladid.is