Steed Lord með sitt fyrsta myndband

„Hugmyndin fæddist þegar við vorum í myndatöku fyrir sænska fatamerkið WeSC fyrr í sumar. Þar kynntumst við snjóbrettamanni sem heitir Andrew Hardingham og við náðum svo vel saman að við ákváðum að fá hann til að leika í myndbandinu okkar," útskýrir söngkonan Svala Björgvinsdóttir. Hljómsveit hennar, Steed Lord, lauk nýverið við tökur á fyrsta tónlistarmyndbandi sínu. Myndbandið er við smáskífuna One Good Reason af nýrri plötu sveitarinnar, Heart II Heart.

Meðlimir Steed Lord sáu sjálf um tökur á myndbandinu og segir Svala það hafa gengið eftir óskum. „Egill Eðvarsson, pabbi strákanna, var einmitt í heimsókn hjá okkur þannig að við fengum hann til að skjóta myndbandið ásamt Einari," útskýrir Svala en Egill er einn reyndasti framleiðandi Ríkissjónvarpsins.

„Við gerum oftast allt sem viðkemur Steed Lord sjálf. Við skutum myndbandið á tvemur dögum hérna í Los Angeles og þetta var mikið stuð," segir Svala. Hljómsveitin kláraði einnig tökur á nýrri hljómplötu fyrir stuttu og var hún tekin upp í hljóðveri hljómsveitarinnar Beastie Boys í Los Angeles. Á plötunni eru átta lög og kemur hún út hinn 7. september.

Hið nýja myndband fer í birtingu innan skamms í fatabúðum WeSC sem finna má um allan heim. Í fyrra gerði Steed Lord samning sem felur í sér að tónlist sveitarinnar fái að óma í raunveruleikaþáttum líkt og Keeping Up With The Kardashians og MTV's The Real World.

„Við gerðum samning við stórt fyrirtæki sem vildi fá tónlist okkar í þessa raunveruleikaþætti og við sögðum já við því. Þetta er fín auglýsing fyrir okkur og bara gaman að þessu," segir Svala að lokum. - sm

Hér má sjá myndbandið.