Bandaríkjamenn brjálaðir yfir markinu sem dæmt var af þeim

Leikmenn og þjálfari bandaríska landsliðsins voru mjög ósáttir eftir 2-2 jafntefli á móti Slóveníu á HM í Suður-Afríku í dag þrátt fyrir að hafa sýnt mikinn karakter með því að koma til baka eftir að hafa lent 2-0 undir. Ástæðan er að mark frá Maurice Edu á 85. mínútu leiksins var dæmt af en markið hefði tryggt Bandaríkjamönnum 3-2 sigur og lykilstöðu í C-riðlinum.

„Það eina sem var í gangi í þessu föstu leikatriði var að Slóvenarnir voru að halda mínum leikmönnum," sagði Bob Bradley, þjálfari Bandaríkjanna. „Einn leikmaður þeirra hélt utan um Michael (sonur Bradley), Michael var að reyna að losa sig og þá var dæmd aukaspyrna. Ég veit ekki hvort þetta var svoleiðis en þetta er allavega ein sagan," sagði Bob Bradley.

Landon Donovan sagðist hafa beðið dómarann Koman Coulibaly frá Malí um að útskýra dóminn sinn en hann fékk engin svör. „Ég get mér þess til að það hafi verið brot einhversstaðar því þetta gat ekki verið rangstæða. Við spurðum hann um hvar brotið hafi verið en hann svaraði ekki. Ef ég segi alveg eins og er þá er ég ekki viss um að hann tali mikla ensku," sagði Landon Donovan.

„Við vorum betri í seinni hálfleiknum og við skoruðum þrjú mörk. Það væri mjög fróðlegt að fá að vita á hvað dómarinn dæmdi í lokin. Það rétta var að við áttum að komast þarna í 3-2," sagði Clint Dempsey og bætti við: „Við erum vonsviknir að vinna ekki leikinn þegar við skoruðu þrjú lögleg mörk," bætti Dempsey við.