Erlendur snýr aftur í nóvember

Erlendur Sveinsson, einn ástsælasti rannsóknar-lögreglumaður Íslands, snýr aftur í nóvember í fjórtándu skáldsögu Arnaldar Indriðasonar. Erlendur hefur lítið komið við sögu í síðustu bókum Arnaldar og leyft aðstoðarmönnum sínum, þeim Elínborgu og Sigurði Óla, að eiga sviðið.

Bók Arnaldar heitir Furðustrandir en höfundurinn sjálfur var fámáll þegar hann var spurður út í nafnið. „Ég get ekki gefið upp hvaðan nafnið Furðustrandir er komið; þá væri ég að uppljóstra of miklu um efni bókarinnar.“ Samkvæmt leitarforritinu google.com nefndi landneminn Eiríkur rauði strandlengju sem lá við Labrador og Nýfundnaland Furðustrandir. En nafnið má líka finna við Skagafjörð þar sem minnismerki um Jón Ósman, Ferjumanninn svokallaða, er að finna. „Ég hef reyndar lesið sögu Ferjumannsins sem Kristmundur Bjarnason skrifaði og það má vel vera að hún komi eitthvað við sögu.“

Arnaldur segir það hafa verið nauðsynlegt fyrir sig að gefa Erlendi smá frí og leyfa Elínborgu og Sigurði Óla að blómstra í tveimur síðustu bókum. Hann bendir jafnframt á að Harðskafi, Myrká, Svörtuloft og nú Furðustrandir tengist allar innbyrðis, þær gerast til að mynda allar á sama tíma, á tveggja til þriggja vikna tímabili haustið 2005. „En nú ætla ég alls ekki að segja meira, fólk verður bara að lesa bókina.“ Samkvæmt Arnalds-hefð kemur bókin út 1. nóvember en í fyrra bar þann dag upp á sunnudag. Að þessu sinni er hann hins vegar mánudagur þannig að bóksalar þurfa væntanlega ekki að keyra hana út eins og gert var í fyrra. - fgg