Lou Reed vildi ekki sjá Boyle

Breskir fjölmiðlar greindu frá því í vikunni að farþegar hefðu kvartað undan ónæði af hálfu söngkonunnar Susan Boyle um borð í flugi frá New York til London í vikunni. Boyle ku hafa sungið hátt og grátið með reglulegu millibili auk þess sem henni þótti ekkert verra að fá sér í tána inn á milli. Bandaríski slúðurvefurinn TMZ komst í gær yfir tölvupóst frá talsmanni Boyle þar sem málið er útskýrt.

Þar virðist Lou Reed vera aðalsökudólgurinn. Boyle átti víst að koma fram í American’s Got Talent og hafði í hyggju að syngja Perfect Day eftir Reed og töldu aðstandendur Boyle þetta nokkuð öruggt útspil enda vinsælt ábreiðulag. Reed fékk veður af þessari uppákomu og aðeins tveimur klukkustundum áður en lagið var tekið upp, hafði hann samband við umboðsmann Boyle og kom í veg fyrir upptökurnar. Boyle hætti síðan við að koma fram í þættinum enda hafði hún ekki æft neitt annað lag.

Fram kemur í bréfinu að Boyle hefði ekki haft neina hugmynd um andstöðu Reed og hún hafi komið henni í opna skjöldu. „Við höfðum enga hugmynd um þessa afstöðu Reed þegar við lögðum af stað frá London,“ skrifaði talsmaður Boyle.