Orðin sérfræðingur um kossa og kynlífsstellingar

„Þetta er náttúrlega aðallega bara hrikalega óþægilegt, að lýsa kynlífsathöfnum í smáatriðum,“ segir Anna Svava Knútsdóttir leikkona hlæjandi en hún er þessa dagana að leggja lokahönd á handrit að sjónvarpsþáttum byggðum á bókinni Makalaus. Fylgifiskur þess er að skrifa nokkrar kynlífssenur. „Þetta er mjög fyndið og alveg ný reynsla fyrir mig að þurfa að lýsa bólförum af nákvæmni. Það er ekki nóg að segja bara „og svo fóru þau inn í herbergi að elskast“. Ég verð að gera þetta almennilega og mér líður stundum eins og ég sé að skrifa Ísfólksbækurnar,“ segir Anna Svava og viðurkennir að hún hafi oft farið hjá sér við skrifin.

Anna Svava er með Súper Sex og aðrar kynlífsfræðibækur til hliðsjónar við skrifin. „Ég er orðin rosa fróð um stellingar og búin að lesa mér til um hinar ýmsu tegundir kossa. Það er fullt af karakterum sem koma fyrir í handritinu og maður þarf einhvern veginn að laga kynlífið að þeim,“ segir Anna Svava en hún hefur einnig þurft að fara í annars konar heimildarvinnu til að undirbúa sig undir þessi handritaskrif.

„Ég bað Tobbu (Þorbjörgu Marinósdóttur, höfund Makalauss) um að taka mig með sér í svona alvöru stelpupartí,“ segir Anna Svava en það var einnig ný reynsla. „Það sem var verst voru hælarnir. Það dugar víst ekkert minna en að vera í 12 cm hælum og ég entist ekki út partíið í þeim. Svo fannst mér merkilegt að sjá skemmtistaðina fyrir neðan Lækjargötuna þar sem efnislítill fatnaður og há tónlist er allsráðandi,“ segir Anna Svava glöð í bragði en hún tók með sér diktafón og skrásetti samtöl stelpnanna. „Þær eru með svona alveg eigið tungumál sem gaman er að vitna í. Svona lingó,“ segir Anna Svava en henni til samlætis skrifa þeir Gunnar Björn Guðmundsson og Ottó Geir Borg einnig hluta af handritinu.

Aðspurð hvort þátturinn verði eins konar íslensk útgáfa af Sex and the City-þáttunum svarar Anna Svava játandi. „Eins og þetta lítur út núna verður þetta stelpuþáttur en strákar hafa líka gaman af þessu.“

alfrun@frettabladid.is