Spyr siðferðislegra spurninga um mannát í smásögu

Siðferðilega hliðin á mannáti er viðfangsefni einnar sögunnar í nýju smásagnasafni Ævars Þórs Benediktssonar. Ævar er þekktastur fyrir að hafa leikið ástmann Georgs Bjarnfreðarsonar í Dagvaktinni.

„Rassvöðvinn er bestur til átu, en maður lætur heilann og lifrina vera, Maður þarf líka að passa að þvo sér vel um hendurnar, eins og með kjúkling," segir leikarinn Ævar Þór Benediktsson.

Nykur sendi á dögunum frá sér smásagnasafnið Stórkostlegt líf herra Rósar og fleiri sögur af ótrúlega venjulegu fólki eftir Ævar Þór. Bókin er sú fyrsta sem hann skrifar, en hann hefur að eigin sögn dundað sér við skriftir undanfarin ár. Sagan Næst á dagskrá fjallar um matreiðsluþátt þar sem fólk lætur elda sig gegn gjaldi. Ævar lagðist í mikla heimildavinnu fyrir söguna og aflaði sér þekkingar á mannáti.

„Ég hafði samband við bæði matgæðinga og líffræðikennara," segir Ævar. „Ég var með alls kyns spurningar um hvernig væri best að matreiða og hvað væri best að matreiða. Ég náði að sjóða saman uppskrift, aðferðir og vinnureglur sem þarf að hafa í huga þegar maður er að elda aðra."

Ævar segir sérfræðingana hafa tekið vel í spurningar sínar, þó að einhverjir hafi krafist þess að fá að vita hvernig upplýsingarnar yrðu notaðar. „Einn kennari sagðist ekkert vita um mannát, en fullyrti að fingurgómar brögðuðust best og benti á annan kennara," segir Ævar.

Siðferðilegu spurningarnar eru ekki langt undan í sögunni. „Fólkið fórnar sér til að sjá fyrir fjölskyldu sinni. Hver er munurinn á því og t.d fara í stríð?" spyr Ævar. „Svo er velt upp fleiri spurningum; hvað með lyf sem voru unnin úr föngum í gamla daga, var það mannát? Og eru blóðgjafir mannát?"

Ævar fagnar útgáfunni á Kaffitári í Bankastræti í kvöld klukkan 20. Allir eru velkomnir. Það skal tekið fram að mannakjöt verður ekki á boðstólum.