Danir hugga Cheryl Cole

Það voru danskir áhorfendur í danska X-Factornum sem voru þeir fyrstu til að sjá enska söngfuglinn Cheryl Cole koma opinberlega fram eftir að stoðirnar hrundu undan hjónabandi hennar og knattspyrnukappans Ashley Cole. Cheryl flúði Bretland eftir að breskir fjölmiðlar grófu upp ástarævintýri eiginmannsins með ókunnugum stúlkum. Nektarmyndir úr símum hans og dónaleg sms-skilaboð voru birt á forsíðum helstu dagblaðanna og að endingu ákvað Cheryl að binda enda á hjónabandið með stuttu smáskilaboði.

Útsendari breska blaðsins Daily Mail var í Kastrup þegar Cheryl lenti í Danaveldi og hann greinir frá því á heimasíðu blaðsins að Cheryl hafi virkað útkeyrð, sirkusinn í kringum einkalíf þeirra hjóna hafi augljóslega tekið á hana. Hún hafi samt sem áður tekið þá ákvörðun að standa við sínar skuldbindingar og syngja í danska X-Factornum.

Cheryl er feikilega vinsæl í heimalandi sínu en hefur ekki náð eyrum annars staðar í Evrópu og Ameríku. Hún og umboðsmaður hennar eru því í mikilli kynningarherferð um þessar tvær álfur til að koma henni á framfæri þar.

Daily Mail greinir einnig frá því að Cheryl og Ashley ætli að setjast niður saman og ræða málin í Frakklandi en þar dvelur hinn smávaxni bakvörður Chelsea vegna meiðsla á ökkla.

Ashley hefur lýst því yfir að allt þetta umrót hafi eyðilagt líf sitt en virðist þó eygja smá von um að þau nái aftur saman.