Íslendingar fljótir að aðlagast nýjum heimkynnum

Katrín Dröfn Guðmundsdóttir, nemandi í þjóðfræði við Háskóla Íslands, og Valý Þórsteinsdóttir spænskufræðingur hafa farið af stað með verkefni sem snýr að Íslendingum búsettum erlendis. Verkefnið nefnist Íslendingar þvers og kruss og munu stúlkurnar taka viðtöl við Íslendinga sem búa erlendis og kanna meðal annars hvernig þeir hafa aðlagast nýrri menningu og hvaða hefðir þeir hafa tekið með sér að heiman.

„Ég hef verið búsett í Barcelona í fimm ár og byrjaði í fjarnámi við Háskóla Íslands í haust. Hugmyndin að verkefninu kviknaði eiginlega um leið og ég hóf nám og mig langaði að fara með hana lengra. Valý leist einnig mjög vel á hugmyndina og við ákváðum að fara með þetta alla leið. Við byrjuðum á að taka viðtöl við Íslendinga hér í Barcelona, Kaupmannahöfn og annars staðar og nú í mars erum við á leið til Bandaríkjanna og Suður-Ameríku til að taka fleiri viðtöl,“ segir Katrín.

Viðmælendur stúlknanna er fólk á öllum aldri, úr öllum kimum samfélagsins og hafa sumir verið búsettir í landinu í nokkra mánuði en aðrir hafa búið þar í marga áratugi. Katrín segir það hafa komið sér skemmtilega á óvart hversu margir Íslendingar væru að gera athyglisverða hluti á erlendri grund og nefnir í því samhengi unga stúlku sem rekur kaffihús í Kólumbíu. Katrín telur að Íslendingar séu fljótir að aðlagast nýjum heimkynnum en segir flesta reyna að halda í íslenskar hefðir.

Aðspurð segist Katrín ætla að taka viðtölin upp bæði í mynd og hljóði og segist vilja nota efnið í útvarps- og heimildarþætti í framtíðinni. „Við höfum fengið mjög jákvæð viðbrögð frá fólki og draumurinn er að geta notað efnið í útvarps- og heimildarþætti eða jafnvel í bók. Svo mun ég auðvitað nota þetta í náminu mínu og vinna BA-ritgerðina mína úr efninu.“ sara@frettabladid.is