Umfjöllun: Sanngjarn sigur baráttuglaðra Blika

Breiðablik vann sinn fyrsta sigur í Pepsi-deild karla í kvöld með því að leggja Val á útivelli, 2-0. Valsmenn eru að sama skapi enn án sigurs eftir þrjá leiki sem í þokkabót hafa allir farið fram á Vodafone-vellinum.

Valsmenn byrjuðu af miklum krafti og voru duglegir að spila sig í gegnum vörn Blikanna. Danni König og Ian Jeffs áttu ágætar marktilraunir á upphafskaflanum en án þess þó að koma boltanum í netið.

Á 25. mínútu meiddist svo Haukur Páll Sigurðsson sem hafði verið afar öflugur á miðjunni hjá Val. Hann þurfti að fara af velli og til að bæta gráu á svart þá skoruðu Blikar á meðan að heimamenn voru enn að undirbúa skiptinguna.

Kristinn Steindórsson var þar að verki eftir laglegan undirbúning Alfreðs Finnbogasonar sem hafði spilað Kristinn frían í gegnum Valsvörnina.

Guðmundur Pétursson átti svo skot í slána örfáum mínútum síðar en Valsmenn gáfust ekki upp. Arnar Sveinn Geirsson komst einn í gegn en lét Ingvar Kale verja frá sér.

Eftir þetta fóru Blikar að sækja enn meira í sig veðrið. Þeir voru að hanga meira á boltanum og létu Valsmenn hafa meira fyrir hlutunum. Valur fékk reyndar upplagt tækifæri til að jafna metin í upphafi síðari hálfleiks en aftur misnotaði Arnar Sveinn upplagt marktækifæri.

Örfáum mínútum síðar svöruðu Blikar með marki en þar var Alfreð að verki með glæsilegu skoti. Við það virtust Valsmenn einfaldlega gefast upp og sigur Blika var aldrei í hættu.

Breiðablik spilaði virkilega vel í síðari hálfleik og sýndu hversu öflugt sóknarlið liðið getur verið. Alfreð var ávallt mjög hættulegur en varnarleikur liðsins var líka traustur og Ingvar Kale átti góðan leik í markinu.

Eftir því sem leið á leikinn og sjálfstraust Valsmanna minnkaði fór um leið að sjá á varnarleik liðsins. Blikar voru duglegir að nýta sér það en Valsmenn geta aðeins sjálfum sér um kennt að hafa ekki nýtt þau færi sem þeir sköpuðu sér betur.



Valur – Breiðablik 0-2

0-1 Kristinn Steindórsson (27.)

0-2 Alfreð Finnbogason (59.)

Vodafone-völlurinn. Áhorfendur: 1.027

Dómari: Jóhannes Valgeirsson (6)

Skot (á mark): 15–11 (9-10)

Varin skot: Kjartan 7 – Ingvar 9

Hornspyrnur: 7–4

Aukaspyrnur fengnar: 12–12

Rangstöður: 0–2

Valur (4-3-3):

Kjartan Sturluson 5

Stefán Eggertsson 7

Reynir Leósson 5

Atli Sveinn Þórarinsson 5

Martin Pedersen 4

Rúnar Már Sigurjónsson 6

Haukur Páll Sigurðsson 6

(27. Sigurbjörn Örn Hreiðarsson 6)

Ian Jeffs 4

(77. Viktor Unnar Illugason -)

Arnar Sveinn Geirsson 5

Hafþór Ægir Vilhjálmsson 6

(71. Matthías Guðmundsson -)

Danni König 6

Breiðablik (4-3-3):

Ingvar Þór Kale 7

Árni K. Gunnarsson 6

Elfar Freyr Helgason 7

Kári Ársælsson 7

Kristinn Jónsson 6

Jökull Elísabetarson 6

Finnur Orri Margeirsson 7

Alfreð Finnbogason 8* ML

(90. Olgeir Sigurgeirsson -)

Haukur Baldvinsson 7

(79. Andri Rafn Yeoman -)

Guðmundur Pétursson 6

(68. Guðmundur Kristjánsson  6)

Kristinn Steindórsson 5

Leiknum var lýst beint á Boltavakt Vísis og Fréttablaðsins og má lesa lýsingu leiksins hér: Valur - Breiðablik.