Pabbi ánægður að ég fái að leika Jón Grindvíking

„Mér líst mjög vel á þetta, það verður mjög gaman að takast á við þetta hlutverk,“ segir Ilmur Kristjánsdóttir. Hún hefur tekið að sér hlutverk Jóns Grindvíkings í uppfærslu Þjóðleikhússins á Íslandsklukku Halldórs Laxness. Leikstjórinn Benedikt Erlingsson tekur óneitanlega mikla áhættu með þessu leikaravali sínu því Jón Grindvíkingur er sögulegur í íslenska leikhúsheiminum eftir að Lárus Pálsson fór á kostum í hlutverkinu og gerði það nánast ódauðlegt.

Ilmur gerir sér vel grein fyrir þeirri pressu sem fylgir þessu hlutverki. „Ég fór einmitt á Þjóðar-bókhlöðuna nýverið og fór að lesa ævisöguna hans Lárusar, rak þá augun í glefsur úr dómum sem birtust eftir frumsýninguna sem voru einróma lof. Á meðan ég var að glugga í þetta þá áttaði ég mig á því að Guðjón Pedersen, fyrrum leikhússtjóri í Borgarleikhúsinu, stóð fyrir aftan mig og var að lesa yfir öxlina á mér en hann lék líka þetta hlutverk,“ segir Ilmur sem er hvergi bangin þótt hún sé þarna að leika karl. „Ég las Íslandsklukkuna þegar ég var sextán ára og mundi ekkert sérstaklega eftir þessum karakter.

En ég hef lært ýmsilegt um hann, Hann var mikið bókanörd og bjargaði handriti sem brann með því að skrifa það upp eftir minni,“ segir Ilmur og viðurkennir um leið að hún sé sjálf ekki mikið bókanörd. „Nei, ég er svona „wannabe“ bókanörd, ég er alltaf að bíða eftir ró og friði til að sinna því áhugamáli,“ segir leikkonan sem hefur nú tekið sér frí frá guðfræðináminu um stundarsakir. „Allavega þetta ár og kannski það næsta. En maður er ekki búinn að loka neinum dyrum með þetta, sem betur fer.“

Ilmur segist hafa leikið mörg hlutverk um ævina, meðal annars sjálfa Sölku Völku úr samnefndri bók nóbelskáldsins. „En ég held að ég hafi aldrei séð pabba minn eins glaðan og þegar ég sagði honum að ég ætti að leika Jón Grindvíking. Hins vegar brá samkennara hans við Fjölbrautaskólann á Akranesi svolítið, íslenskukennaranum, og áréttaði mjög alvarlegur að það mætti alls ekki gera grín að honum,“ segir Ilmur. Frumsýnt verður 21. apríl næstkomandi en með önnur hlutverk í sýningunni fara þau Lilja Nótt Þórarinsdóttir sem er sjálf Snæfríður Íslandssól og Ingvar E. Sigurðsson sem leikur Jón Hreggviðsson.

freyrgigja@frettabladid.is