Barrymore hafnar bótoxi

Kvikmyndastjarnan Drew Barrymore hefur verið að leika síðan hún var 12 mánaða og hefur bókstaflega alist upp á hvíta tjaldinu. Leikkonan sem er 35 ára segist ekki ætla að leggjast undir hnífinn til þess að laga hrukkurnar eða línurnar sem hafa myndast í kringum munninn hennar og augun.

„Ég er það forvitin um hvað eigi eftir að gerast þegar ég eldist að ég vil ekki eyðileggja það með skurðaðgerðum og bótoxi," útskýrði hún. Hún bætti síðan við að enginn viti hvaða langtíma afleiðingar þessar aðgerðir hafi og segir þeim sem láta sprauta í sig bótoxi að hætta því strax. Drew upplifði erfiða æsku, byrjaði að drekka áfengi og dópa áður en hún varð 10 ára og fór í meðferð aðeins 13 ára gömul. Hún segir líka að þyngdin hennar hafi einnig valdið vandamálum er hún var yngri. Bekkjarfélagar hennar sáu hana sem „feita barnið" sem þau ættu að berja.

„Af því ég var að vinna voru vinir mínir allir fullorðnir," sagði hún við breska dagblaðið The Daily Mail. „Ég þurfti oft að skipta um skóla því fólk þekkti mig úr kvikmyndum og ég var „feita barnið" sem var barin á hverjum degi. En ef þú getur komist í gegnum svona tíma verður þú betri manneskja," bætti hún við að lokum.