Útborgunardagur á Hrauninu á morgun

Hreiðar Már Sigurðsson, fyrrverandi bankastjóri Kaupþings, fékk um átján og hálfa milljón í laun á viku árið 2006. Dagpeningar hans á Litla-Hrauni nema 3.150 krónum á viku en útborgunardagur er á Hrauninu morgun.

Í þriðja bindi Rannsóknarskýrslu Alþingis kemur fram að heildarlaun Hreiðars Más Sigurðssonar voru rúmar 80 milljónir á mánuði árið 2006. Hann þénaði því rúmlega átján komma fjórar milljónir á viku og hafði því rúmlega tvær komma sex milljónir hvern einasta dag ársins.

Nú er af sem áður var. Nú bjóðast Hreiðari aðeins 630 krónur fyrir hvern virkan dag vikunnar á meðan hann situr í gæsluvarðhaldi. Heildargreiðsla er því 3.150 krónur á viku en greitt er út er á föstudögum.

Erlendur Baldursson, deildarstjóri Fangelsismálastofnunnar, segir sömu reglur gilda fyrir alla gæsluvarðhaldsfanga og þeir geti þegið dagpeninga óháð fyrri tekjum.

Í reglum um gæsluvarðhaldsvist er skýrt kveðið á um hvernig móttaka fanga skuli fara fram.

Við komuna í fangelsið skal fangi afhenda persónulega muni og líkamsleit er framkvæmd á honum. Áður en fanginn er svo færður til klefa síns er heimilt að ákveða hvort hann fari í bað eða sturtu.

Samkvæmt heimildum fréttastofu hefur Hreiðar Már farið fram á að fá grænmetisfæði á meðan hann er í gæsluvarðhaldi. Erlendur segir að við slíkum óskum sé brugðist og fangelsisyfirvöld útvegi fæðið.

Alla jafna eru gæsluvarðhaldsfangar fluttir í Skodabifreið lögreglu í gæsluvarðhald á Litla Hrauni og nær undantekningarlaust í handjárnum og jafnvel fótjárnum ef þeir eru taldir hættulegir. Athygli vekur að Kaupþingsmönnum var ekið í stórum jeppa á Hraunið með skyggðum rúðum og þeir voru ekki handjárnaðir. Aðspurður segir Erlendur að lögregla svari fyrir hvernig á því stóð.