Draumur að spila með Parade

Rokksveitin Who Knew er á leiðinni í tónleikaferð um Þýskaland og Sviss til að fylgja eftir sinni fyrstu plötu, Bits and Pieces of a Major Spectacle, sem kom út í vor.

Ferðin hefst í dag og fimm dögum síðar spilar sveitin á undan Wolf Parade á tónleikum í Berlín. Söngvarann Ármann Ingva Ármannsson hlakkar mikið til, enda hefur kanadíska sveitin lengi verið í miklum metum hjá honum. „Þetta er ákveðinn draumur en mér finnst aðallega skemmtilegt að sjá þá spila. Það er skrítið að við skulum vera settir saman með bandi sem er alltaf verið að líkja okkur við en þetta er allt voða skemmtilegt,“ segir Ármann.

Who Knew var á þriggja mánaða tónleikaferðalagi um Evrópu í sumar þar sem hún spilaði mestmegnis í Þýskalandi, enda er sveitin með útgáfusamning við þarlent fyrirtæki. „Þetta var fyrsti stóri túrinn okkar og ég myndi segja að hann hafi gengið mjög vel. Það er núna verið að bjóða okkur meira og meira.“ Til að mynda hefur bandarískt útgáfufyrirtæki sýnt Who Knew áhuga og hugsanlega mun eitthvað koma út úr því á næstunni.

Ýmislegt skemmtilegt gerðist í tónleikaferðinni þar sem þeir spiluðu fyrir allt að 2.500 manns. Sveitin var aðalnúmerið á tónlistarhátíð á Ítalíu þar sem viðtökurnar voru ótrúlegar. „Fólk brjálaðist og braust í gegnum girðingar og upp á svið,“ útskýrir Ármann. Einnig birtist grein í tímaritinu Rolling Stone þar sem farið var fögrum orðum um hljómsveitina. -fb