Lögreglunni bar skylda til að sinna kalli frá dómnum

„Við erum kallaðir þarna til af dómara eftir að tilraunir dómara og þingvarða til þess að fá fólk, sem að var ofaukið i réttarsalnum, út úr salnum báru ekki árangur og við sinnum einfaldlega því kalli," segir Stefán Eiríksson lögreglustjóri á höfuðborgarsvæðinu.

Lögreglan handtók tvo menn í morgun sem voru að fylgjast með fyrirtöku í máli níu manna sem eru ákærðir fyrir brot gegn Alþingi og brot gegn valdstjórninni í Búsáhaldarbyltingunni í fyrra.

Ragnar Aðalsteinsson hæstaréttarlögmaður og Birgitta Jónsdóttir þingmaður gagnrýndu handtökuna í samtali við fréttamann fréttastofu Stöðvar 2 og Vísis í dag. Stefán Eiríksson segir að lögreglan geri bara það sem henni ber lögum samkvæmt. „Ég get ekki meira sagt vegna þess að ég veit ekki mikið meira um málið," segir Stefán.

Spurður um það hvort hann hyggist fara sérstaklega yfir málið, segir Stefán að lögreglan fari yfir öll verkefni sín og velti þeim fyrir sér. „Okkar verk að sinna því þegar dómarar, eins og allir aðrir, kalla," segir Stefán Eiríksson.