Harry Potter-stjarna með stúlku

Fjölmiðlar vestanhafs halda því fram að Daniel Radcliffe sé að fara á fjörurnar við stjúpdóttir framleiðanda myndanna um galdrastrákinn Harry Potter.

Sést hefur til leikarans með hinni 19 ára gömlu Olive Uiacke nokkuð oft á síðustu vikum. Til að mynda djömmuðu þau saman í Rússlandi nýlega þar sem stjarnan hélt upp á 21 árs afmæli sitt auk þess sem þau sáust láta vel hvort að öðru á krikketleik í London í síðustu viku.

Vinskapur hefur verið á milli þeirra síðan Radcliffe lék í fyrstu Potter-myndinni árið 2001.

„Þau hafa þekkst lengi, alveg síðan framleiðsla á Harry Potter-myndunum hófst. Þau urðu fyrst náin fyrir nokkrum árum en sambandið fjaraði út. Þau hafa þó alltaf haldið vinskap og á síðustu mánuðum hefur sambandið orðið sterkara," segir heimildarmaður.

Nokkuð hefur verið rætt um það hvort Uiacke sé á eftir peningum Radcliffes en hún á nóg af peningum sjálf svo það er af og frá.