Fengu loks sigurlaunin í Popppunkti

„Það er svona þegar verðlaunin eru ekki prentuð á pappír og afhent strax. Þá vill þetta oft fara á flakk milli skrifborða en við erum búnir að leysa þetta núna,“ segir Felix Bergsson, spyrill í Popppunkti. Síðasti þáttur sumarsins í spurningakeppni tónlistarmanna var á laugardaginn þegar Skriðjöklar og Lights on the Highway öttu kappi í úrslitum. Lights on the Highway fór með sigur af hólmi. Athygli vakti þegar Guðmundur Svafarsson, liðsmaður Ljótu hálfvitanna, mætti til að krýna arftaka sína að þá lét hann þau orð falla að sigurvegararnir ættu ekki að vera of glaðir; það hefði reynst þrautin þyngri að innheimta vinningana frá því á síðasta ári.

Guðmundur vildi hins vegar lítið tjá sig um málið þegar Fréttablaðið hafði uppi á honum og Dr. Gunni segir að þetta sé allt einn stór misskilningur. „Það fór einhver í sumarfrí og þetta gleymdist en við erum búnir að fá verðlaunin núna,“ sagði Guðmundur í samtali við Fréttablaðið. Felix vildi hins vegar ekki meina að þeir hefðu ákveðið að tóna niður verðlaunin í ár vegna þessa „miskilnings“. „Nei, þetta var stundum svolítið „2002“ hjá okkur, utanlandsferðir og eitthvað svoleiðis. En þetta er bara í takt við tíðarandann,“ segir Felix og bætir því við að þeir séu þegar farnir að leggja drög að næsta sumri. „Við erum búnir með hundrað þætti og eigum samt eftir slatta af hljómsveitum á borð við Todmobile og Bubba.“ - fgg