Taka við berstrípuðu leikhúsi

Nýverið var greint frá því að Hafnarfjarðarbær hefði samið við Gaflaraleikhúsið um rekstur leikhúss að Strandgötu 50 í Hafnarfirði sem áður hýsti Hafnarfjarðarleikhúsið. Björk Jakobsdóttir, Gunnar Helgason, Lárus Vilhjálmsson, Gunnar Björn Guðmundsson og Ágústa Skúladóttir koma að Gaflaraleikhúsinu en reiknað er með því að nýja leikhúsið verði opnað um mánaðamótin október-nóvember.

Björk og Gunnar áttu sinn þátt í því að koma Hafnarfjarðarleikhúsinu Hermóði og Háðvör á laggirnar fyrir sextán árum og þau fá svo sannarlega að byrja með Gaflaraleikhúsið frá grunni. „Nei, það eru engin ljós, engir bekkir, engir stólar fyrir áhorfendur, ekki neitt. Ætli við rukkum nokkuð inn á opnunina heldur biðjum fólk bara um að koma með stóla og borð. Þetta verður svona svipað og þegar fólk er að safna í stell,“ segir Björk.

Hópurinn fær lykla að húsinu afhenta í dag en í gær var unnið hörðum höndum að því að fjarlægja allt úr húsinu. Björk segir þau einfaldlega ætla að laga starfsemi hússins að umhverfinu. En það séu stórar og miklar hugmyndir í bígerð. „Já, það er barnaleikrit eftir Gunnar Helgason, söngleikur, ævintýraleikrit, uppistand og revíuprógramm, við höfum alveg endalaust mikið af hugmyndum og hlökkum alveg óskaplega mikið til að byrja,“ segir Björk. - fgg