Áhugi frá bandarískri útgáfu

Hiphop-hljómsveitin Original Melody er í viðræðum við lítið bandarískt útgáfufyrirtæki, Hartke Records, um að það kynni og dreifi nýjustu plötu hennar, Back & Forth, sem kemur út 1. október.

„Við erum að skoða þennan samning. Við ætlum að fara vel yfir þetta áður en við skrifum undir,“ segir Ívar Schram úr Original Melody. „Fyrirtækið er í Kansas. Þar var gæi sem fann okkur á netinu. Við áttum saman fund á Skype þar sem hann var að útskýra hvað hann vildi gera. Hann vill reyna að koma tónlistinni út fyrir landsteinana og byggja upp aðdáendahóp. Þetta er bara gaman og vonandi kemur eitthvað út úr þessu.“

Stutt er síðan nýju plötunni var lekið á netið á bandarísku hiphop-bloggsíðunni Thewordisbond.com. Ívari tókst sem betur fer að stöðva lekann. „Við bjuggum til síðu fyrir plötuna og þar átti hún að vera læst. Náungi á þessari bloggsíðu fann plötuna og póstaði á bloggið sitt. Þar sá ég að allt í einu voru mörg hundruð manns búnir að hlaða niður titillaginu,“ segir Ívar. „Ég sendi þeim póst og sagði þeim að þessi plata væri langt í frá ókeypis og bað þá um að taka hana út.“

Back & Forth er fyrsta plata Original Melody síðan Fantastic Four kom út fyrir fjórum árum. Engir gestarapparar koma við sögu í þetta sinn. Einn gestur syngur þó á plötunni, Þorsteinn Kári Jónsson, sem söng með Hjaltalín í MH áður en sveitin sló í gegn. „Hann stóð sig fáránlega vel,“ segir Ívar. - fb