Feyenoord í fallslag í Hollandi

Hollenska stórliðinu Feyenoord hefur gengið skelfilega á leiktíðinni er nú í þriðja neðsta sæti hollensku úrvalsdeildarinnar eftir að hafa tapað fyrir Groningen um helgina, 2-0.

Feyenoord tapaði fyrr á leiktíðinni fyrir toppliði PSV, 10-0 eins og frægt er. Mario Been er þrátt fyrir allt enn knattspyrnustjóri liðsins og hann hefur ekki trú á því að liðið muni falla úr deildinni.

„Staða liðsins er félagi eins og Feyenoord ekki sæmandi en þetta er engu að síður raunin," sagði Been í viðtali á heimasíðu félagsins.

„Við verðum nú að taka þátt í fallbaráttu deildarinnar. Meiðsli leikmanna hafa reynst okkur erfið en ég er viss um að þegar við endurheimtum marga af okkar reyndustu leikmönnum mun Feyenoord komast aftur á rétta braut."

„Ég er handviss um að við höldum okkar sæti í deildinni - Feyenoord mun aldrei falla úr úrvalsdeildinni."

Feyenoord er með þrettán stig eftir fimmtán leiki og hefur aðeins unnið einn af síðustu ellefu deildarleikjum sínum.