Badu kærð fyrir að fækka fötum

Söngkonan Erykah Badu hefur verið kærð fyrir ósiðlegt athæfi í myndbandi sínu við lagið Window seat. Í myndbandinu gengur Badu niður götu í Dallas og týnir af sér spjarirnar eina af annari. Hún endar á evuklæðunum einum og skömmu síðar er eins og hún sé skotin í höfuðið. Myndbandið hefur vakið gríðarlega athygli og hneykslan sumra en í myndbandinu er Badu skotin á sama stað og John F. Kennedy bandaríkjaforseti sem myrtur var í borginni árið 1963.

Lögreglustjórinn í Dallas hefur staðfest að sönkonan verði ákærð en kona ein sem var vegfarandi þegar myndbandið var tekið upp kærði atvikið til lögreglu. Hún má búast við að verða sektuð fyrir athæfið.