Peaches á leið til Reykjavíkur í annað sinn

„Peaches er mjög spennt fyrir Reykjavík og kemur hingað ásamt hljómsveit og vinafólki,“ segir Eldar Ástþórsson, sem skipuleggur tónlistardagskrá Reykjavík Fashion Festival.

Tónlistarkonan Peaches treður upp á hátíðinni, sem haldin verður dagana 18. til 21. mars. Tónleikar Peaches verða á Nasa við Austurvöll, en þar fer dagskrá hátíðarinnar að mestu leyti fram.

Peaches kemur, að sögn Eldars, beint frá Berlín til að hrista upp í Reykjavík.

Hún er þekkt fyrir ögrandi framkomu, eins og nöfnin á plötum hennar gefa til kynna, sem heita meðal annars Fatherfucker, Impeach My Bush og I Feel Cream. Sú síðastnefnda kom út í fyrra og innihélt klúbbasmellina Talk to Me og Loose You.

Peaches hefur unnið með mörgum þekktum nöfnum í tónlistarheiminum.

Hún hefur sungið tvö lög með rokkafanum Iggy Pop, farið í tónleikaferðlag með Marilyn Manson, sungið með Flaming Lips ásamt því að hafa endurgert lög hljómsveita á borð við Yeah Yeah Yeah‘s, Queens of the Stone Age og Basement Jaxx. - afb