Ráðin í vinnu hjá indverskum svifvængjaframleiðanda

„Ég rak augun í frétt í Cross Country, sem er breskt tímarit sem fjallar um svifvængjaflug, um nýtt fyrirtæki á Indlandi sem var að leita að vængjahönnuðum og tilraunaflugmönnum,“ segir Aníta Hafdís Björnsdóttir, sem var nýlega ráðinn kynningarfulltrúi indverska fyrirtækisins Sun Paragliders sem framleiðir svifvængi.

„Ég skrifaði þeim af rælni vitandi að ég gæti hvorugt, en spurði hvort þá vantaði ekki flugmann sem kynni smá í grafískri hönnun og mikið í að hanga á Facebook. Þeir svöruðu um hæl og sögðu að forstjórinn hefði fylgst með blogginu mínu og að þeir vildu fá mig til liðs við sig,“

Aníta Hafdís hefur stundað svifvængjaflug frá árinu 2007 og frá því í desember hefur hún ferðast um heiminn ásamt vinkonu sinni, Ásu Rán Einarsdóttur, og stundað íþróttina af miklum móð. Aðspurð segir Aníta starfið hjá Sun Paraglide vera sannkallað draumastarf enda geti hún sinnt áhugamálum sínum á sama tíma. „Ég fæ að skrifa um vörurnar og hanna þær, ferðast og fljúga og vona bara að ég fái að sinna þessu starfi eins lengi og hægt er,“ segir Aníta glöð í bragði.

Áætlað er að nýjar vörur frá fyrirtækinu komi á markaðinn snemma á næsta ári og mun Aníta þá taka þátt í kynningarstarfinu. Í haust heldur hún þó til Grikklands þar sem hún mun vinna hjá þarlendu ferðaþjónustufyrirtæki. „Þetta er fyrirtæki sem fer með svifvængjaflugmenn í skipulagðar flugferðir um Grikkland. Ég verð bílstjóri og mun skutla flugmönnunum á flugstað og sækja þá svo aftur þar sem þeir lenda. Og ég fæ auðvitað líka að fljúga eitthvað sjálf,“ segir hún að lokum.

sara@frettabladid.is