Leikarabörn stíga fyrstu skrefin á hvíta tjaldinu

Eygló Hilmarsdóttir og Sigurbjartur Atlason eru bæði börn landsfrægra leikara og fara með hlutverk í kvikmyndinni Gauragangur, sem hóf tökur sínar í vikunni. Bæði eru þau sammála um að það að hafa alist upp með annan fótinn í leikhúsi hafi ýtt undir áhuga þeirra fyrir listinni að leika.

„Allt frá því ég var lítil hefur mér fundist vinnan hjá mömmu og pabba mjög spennandi. Sérstaklega fólkið í kringum leikhúslífið, mér fannst það alltaf svo skemmtilegt,“ segir Eygló Hilmarsdóttir, dóttir Hilmars Jónssonar, leikstjóra og leikara, og Sóleyjar Elíasdóttur leikkonu en hún fer með hlutverk Höllu, bestu vinkonu Orms. Sigurbjartur Atlason, sonur Atla Rafns Sigurðarsonar leikara, tekur í sama streng: „Ég eyddi miklum tíma í leikhúsinu þegar ég var lítill og get alveg sagt að ég hafi heillast af leikhúsmenningunni,“ segir Sigurbjartur sem hefur meðal annars leikið í leikritunum Jón Oddur og Jón Bjarni, Dýrin í Hálsaskógi og Vatni lífsins. Hann mun taka að sér hlutverk Svenna sveitó í myndinni.

Eygló og Sigurbjartur eiga fleira sameiginlegt en að hafa alist upp bak við tjöldin í leikhúsum landsins. Bæði eru þau virkir meðlimir í leikfélögum hjá sínum menntaskóla, Eygló er formaður leikfélagsins Herranótt í MR og Sigurbjartur virkur meðlimur í LFMH, og eru þetta þeirra fyrstu skref á hvíta tjaldinu, eða svona næstum því. „Ég lék lítið statistahlutverk í Mávahlátri, var stelpan í bleiku kápunni 17. júní. Það voru mínar fyrstu tvær sekúndur af frægð,“ segir Eygló hlæjandi.

Sigurbjartur segist vera smá stressaður fyrir frumrauninni fyrir framan linsuna. „Það er pínu stressandi að vera að fara að leika í bíómynd núna því ég hef aldrei gert þetta áður en ég er samt mjög spenntur og hlakka til að takast á við þetta,“ segir Sigurbjartur og viðurkennir að það sé mjög þægilegt að hafa pabba sér til halds og trausts í vafaatriðum.

Eygló og Sigurbjartur fóru í prufur fyrir næstum ári en leikstjórinn, Gunnar Björn Guðmundsson, hélt opnar áheyrnarprufur víðs vegar um landið og prófaði kringum 700 manns. „Þetta var svolítið langt ferli en ég er mjög glöð að hafa fengið hlutverk. Þetta verður spennandi,“ segir Eygló að lokum en hennar fyrsti dagur í tökum er í dag.alfrun@frettabladid.is