Framkvæmdastjóri móttökusviðs færir sig um set

„Ég kveð Regnbogann með söknuði. Ég er búinn að vera þarna í 30 ár og bý yfir mikilli reynslu,“ segir Halldór Ómar Sigurðsson, framkvæmdastjóri móttökusviðs Regnbogans.

Fréttablaðið greindi frá því í gær að Regnboganum yrði lokað í sumar ef Sena finnur ekki rekstrarstoð undir bíóið og fær ekki betri leigusamning. Öllu starfsfólki hefur verið sagt upp störfum á meðan reynt er að greiða úr rekstrarvandanum. Halldór Ómar hefur starfað í kvikmyndahúsinu frá því að það var opnað árið 1980. Honum hefur verið tilkynnt að hann fái starf í Háskólabíói, ef Regnboganum verður lokað.

„Þetta er rétt. Björn Sigurðsson, rekstrarstjóri hjá Senu, var að segja mér að mér stendur til boða að fara í Háskólabíó. Ég vil gera það,“ segir Halldór, en hann var staddur í strætó á leiðinni í Regnbogann þegar Fréttablaðið náði í hann. „Ég verð í nýjum búningi og fæ nýtt spjald. Þar stendur Háskólabíó – framkvæmdastjóri móttökusviðs.“

Halldór hefur sett svip sinn á bæjarlífið, enda búinn að taka á móti gestum í Regnboganum og rífa af miðum í 30 ár. Hann er þó spenntur fyrir nýjum starfsvettvangi, en gerir eina kröfu áður en hann yfirgefur Hverfisgötuna: „Ég verð að láta taka mynd af mér við Regnbogann þegar hann hættir.“ atlifannar@frettabladid.is