Selma Björnsdóttir á skólabekk í Bristol

„Þetta er eitthvað sem ég hef gengið með í maganum í tíu ár og núna fannst mér rétti tíminn til að láta verða af þessu,“ segir Selma Björnsdóttir sem hyggst flytja sig um set og setjast að í menningarborginni Bristol á suðvesturströnd Englands. Þar ætlar Selma að setjast á skólabekk og taka meistaranám í drama-leikstjórn við Bristol Old Vic Theater School þar sem ekki ómerkari menn en Óskarsverðlaunahafinn Daniel Day Lewis og stórleikarinn Pete Postlethwaite hafa numið sín fræði.

Selma segir margt hafa áhrif á þá ákvörðun sína að velja Bristol. Þar sé blómleg menning, leikhúslífið sé lifandi og ekki mega gleyma tónlistarsenunni sem hefur alið af sér listamenn á borð við Portishead og Massive Attack. „Mikil-vægast er samt að ég er fjölskyldumanneskja og Bristol er engin London. Það hafa nokkrir Íslendingar stundað nám við þennan skóla, fólk eins og Magnús Geir Þórðarson, og þeir hafa allir talað ákaflega vel um þennan skóla,“ segir Selma og bendir á að skólinn sé lítill og hafi orð á sér fyrir að vera heimilislegur. „Og svo er hann staðsettur í fjölskylduvænu hverfi sem skiptir mig miklu máli.“

Að sögn Selmu líst fjölskyldunni bara nokkuð vel á flutningana en hún heldur ein utan í næsta mánuði til að finna hentuga íbúð fyrir þau fjögur. Námið sjálft er fimmtán mánuðir og að sögn Selmu líst hinum sjö ára gamla Gísla Birni langbest á þessa ráðstöfun. „Hann er farinn að æfa sig að segja Manchester United. Hann fær að sjá Wayne Rooney með eigin augum og það er nóg fyrir hann,“ segir Selma. - fgg