Britney má ekki tala við Lindsey

Pabbi hennar Britney Spears hefur bannað henni að tala við Lindsey Lohan, en þær stöllur hafa skipst á að halda uppi slúðursíðum heimsins síðustu árin. Bandaríska slúðurblaðið The National Enquirer heldur því fram að pabbinn sé ekki par hrifinn af því að Britney hafi endurnýjað kynni sín við Lindsey.

Lohan mun hafa haft samband við Britney og beðið hana um góð ráð til þess hressa upp á ferilinn en segja má að Lindsey megi muna fífil sinn fegurri. Sama má reyndar segja um Britney. Þær spjölluðu saman í síma en um leið og Britney minntist á samtalið við pabba gamla varð hann óður, að því er blaðið segir.

Hann mun hafa hringt í umboðsmenn Lindsey og sagt þeim að hann myndi ekki líða það ef rauðhærða leikkonan reyndi að hafa samband við dóttur sína á ný.

Britney skammaðist sín all svakalega fyrir afskiptasemi pabba gamla enda er hún orðin fullorðin kona og tveggja barna móðir. „Henni líður eins og hún sé orðin þrettán ára aftur," hefur blaðið eftir áreiðanlegum heimildum úr innsta hring.