Bankaráð hætti við að hækka laun seðlabankastjóra

Pétur Blöndal, þingmaður Sjálfstæðisflokksins, vill að bankaráð Seðlabankans hætti við að hækka laun seðlabankastjóra um rúmar 400 þúsund krónur á mánuði. Hann telur eðlilegt að ráðið fresti þess í stað að hækka launin í 1-2 ár.

Bankaráð Seðlabanka Íslands hefur nú til umfjöllunar tillögu þess efnis að hækka laun Más Guðmundssonar, seðlabankastjóra, um 400 þúsund krónur á mánuði, að því að fram kemur í Morgunblaðinu. Launin verða þá þau sömu og þau voru áður en ákveðið var að lækka þau í desember 2008 og aftur í febrúar síðastliðnum samkvæmt breytingum á lögum um kjararáð. Bankaráð hefur ekki samþykkt tillöguna.

„Þetta er sá vandi sem felst í þessari jafnlaunastefnu sem ég var á móti. Þeir aðilar sem hugsanlega geta fengið betri laun annars staðar standa frammi fyrir þessu vali. Þetta sést til dæmis vel hjá heilbrigðisstéttunum," segir Pétur.

Bankaráð sendir slæm skilaboð

Samþykki bankaráð tillöguna sendir ráðið slæm skilaboð út í samfélagið, að mati Péturs. „Það er búið að setja jafnlaunastefnu og það væri mjög ósanngjarnt að hoppa úr þeirri röð gagnvart öllum hinum sem eru bundnir á þennan klafa. Þetta myndi heldur ekki senda góð skilaboð til þeirra sem eru atvinnulausir og eru að basla í mjög erfiðri og stundum vonlausri stöðu. Auk þess hafa margir tekið á sig umtalsverða kjaraskerðingu."

Pétur vill því að bankaráð hætti við að hækka laun seðlabankastjóra. „Ég held að þau ættu að fresta þessu í eitt eða tvö ár á meðan við komumst yfir versta kaflann."

Undrast að Seðlabankinn hækki laun

Þá bendir Pétur að sínu mati komi Seðlabankinn í veg fyrir atvinnusköpun í landinu með of háum vöxtum. „Það væri því mjög undarlegt að sá aðili sem er í því að búa til þetta atvinnuleysi með of háum vöxtum skuli gangan á undan með því að hækka launin."