Stuttmyndadagar að hefjast

Hinir árlegu Stuttmyndadagar verða í haldnir þann 31. maí en frestur til að skila inn myndum rennur út 3. maí. Baldvin Z, Nanna Kristín Magnúsdóttir og Vera Sölvadóttir sitja í dómefndinni í ár en veitt verða peningaverðlaun fyrir þrjú fyrstu sætin: sigurvegarinn fær hundrað þúsund krónur, myndin sem lendir í öðru sæti fær 75 þúsund og þriðja sætið hlýtur fimmtíu þúsund.

Allar nánari upplýsingar og reglur um myndirnar er að finna á vefsíðu hátíðarinnar, stuttmyndadagar.is. Skipuleggjendur hátíðarinnar vilja vekja sérstaka athygli á því að myndirnar mega ekki vera lengri en fimmtán mínútur og að Íslendingar verða að vera í lykilstörfum og/eða hlutverkum.

Venju samkvæmt verða sérstök áhorfendaverðlaun veitt og þá mun Sjónvarpið sýna verðlaunamyndirnar. Leikstjóra sigurmyndarinnar verður síðan boðið á Short Film Corner sem haldið er ár hvert í kringum Cannes-hátíðina.

Stuttmyndahátíðin hefur verið haldin síðan 1991 en þar hafa margir af fremstu leikstjórum þjóðarinnar stigið sín fyrstu skref. Nægir þar að nefna Ragnar Bragason, Grím Hákonarson, og Reyni Lyngdal.