Össur ósammála Jóhönnu um málskotsréttinn

Forsætisráðherra og utanríkisráðherra eru ósammála um það hvort afnema eigi málskotsrétt forseta Íslands. Jóhanna Sigurðardóttir forsætisráðherra sagði eftir ríkisstjórnarfund á þriðjudaginn að hún teldi að leggja ætti niður málskotsréttinn í núverandi mynd. Hún vildi að þjóðin gæti sjálf kallað beint eftir þjóðaratkvæðagreiðslu.

Í fyrirspurnartíma á Alþingi í morgun benti Sigurður Kári Kristjánsson, þingmaður Sjálfstæðisflokksins, á að þetta væri í mótsögn við skoðun Össurar Skarphéðinssonar, utanríkisráðherra og þáverandi formanns Samfylkingarinnar, þegar forseti beitti málskotsréttinum á fjölmiðlafrumvarpið. Hann hefði þá verið þeirrar skoðunar að málskotsréttur forsetans væri nauðsynlegur. Össur svaraði Sigurði Kára því til að hann væri enn sömu skoðunar og hann var í fjölmiðlamálinu. Hann útilokaði hins vegar ekki að skoðun hans myndi breytast ef stjórnlagaþing kæmist að þeirri niðurstöðu að breyta ætti málskotsréttinum.

Sigurður Kári Kristjánsson sagði að klofningur væri í ríkisstjórninni um synjunarvald forsetans. Mikilvægt væri að ríkisstjórnin markaði sér stefnu í þessum efnum. Össur sagðist vera ósammála þessu mati. Það væri stjórnlagaþings að móta stefnuna í þessum efnum.