Norðurlöndin sópa að sér íslenskum sjónvarpsþáttum

„Þetta er svakalega stórt fyrir okkur að selja íslenska þáttagerð til Norðurlandanna,“ segir Magnús Viðar Sigurðsson hjá Saga Film.

Saga Film hefur selt íslenska sjónvarpsþáttinn Pressa, eftir Sigurjón Kjartanson og Óskar Jónassyni, til norska ríkissjónvarpsins, NRK 1. Norskir áhorfendur munu bera glæpaseríuna augum 1. júlí þegar fyrsti þátturinn verður sýndur. Einnig hefur framleiðslufyrirtækið selt sænsku ríkisstöðinni SVT1 þættina Svarta Engla en þeir birtast á sænskum sjónvarpsskjám á næstunni.

Magnús Viðar er að vonum ánægður með viðskiptin og viðurkennir að þetta sé alltaf markmiðið þegar farið er í framleiðslu á íslensku efni. „Allt snýst þetta um áhorf og ef við fáum góðar áhorfstölur þá erum við betur stödd þegar við sækjum um erlenda styrki,“ segir Magnús, en sala á efni til Skandinavíu skiptir höfuðmáli til að fá styrki.

„Við erum að komast með annan fótinn inn í þessa stóru sjóði og getum vel farið að etja kappi við stóru kallana frá hinum löndunum. Það er gríðarlega mikill áhugi að utan á íslensku samfélagi og við erum náttúrulega að endurspegla íslenskan raunveruleika í þessum þáttum.“

Magnús segir best að komast að hjá stóru þjóðunum eins og Þýskalandi því þar er bæði áhorfið og peningarnir meiri. Unnið er að sölu á fleiri þáttum til útlanda sem Magnús segir ótímabært að segja frá að svo stöddu.

Það má ef til vill áætla mikil umfjöllun um Ísland í erlendum fjölmiðlum nýverið, vegna hrunsins og elgossins í Eyjafjallajökli, spili inn í áhuga manna á sjónvarpsefni frá og um Ísland. Norðurlandabúar fá að sjá mikið af íslensku efni á næstunni. Skemmst er að minnast þess að finnska ríkissjónvarpið keypti sýningarréttinn á Nætur-, Dag- og Fangavaktinni í lok síðasta árs.

Snorri Þórisson hjá framleiðslufyrirtækinu Pegasus tekur undir að áhuginn sé mikill að utan. „Við erum búnir að selja íslensku þættina Hamarinn til ríkistöðvanna í Svíþjóð, Noregi og Finnlandi,“ segir Snorri en sýningar hefjast líklega með haustinu.

alfrun@frettabladid.is