Leikmenn grétu upp á herbergi hjá Domenech

Raymond Domenech, landsliðsþjálfari Frakklands, hefur sakað leikmenn landsliðsins um að haga sér eins og börn eftir að þeir neituðu að æfa á sunnudag. Það er allt í loft upp í herbúðum liðsins og atburðarrásin er farin að minna á góðan þátt af Glæstum vonum. Reyndar er þetta allt einn sandkassaleikur og Domenech er ekki að standa sig vel í hlutverki leikskólastjóra.

Frakkar hafa aðeins eitt stig eftir fyrstu tvo leikina, Anelka var sendur heim eftir að hafa kallað þjálfarann hóruson og meira að segja forseti landsins hefur skipt sér af málefnum liðsins. Stemningin í hópnum virðist ekkert hafa lagast og nú hefur þjálfarinn ákveðið að ráðast á leikmenn sína.

"Ég reyndi að koma leikmönnum í skilning um að þessi hegðun væri barnaleg, hreinlega kjánaleg," sagði Domenech en það kæmi engum á óvart ef hann stillti upp gjörbreyttu liði í lokaleiknum. Aðspurður hvort einhverjir leikmenn hefðu beðið um að sleppa lokaleiknum sagði Domenech að það ætti eftir að fara endanlega yfir þau mál.

Domenech segir það enn fremur hafa verið rétta ákvörðun að senda Anelka heim.

Hermt er að fyrirliðinn Patrice Evra fari fyrir uppreisn leikmanna gegn þjálfaranum en framkvæmdastjóri knattspyrnusambandsins segir að aðrir reyndir leikmenn liðsins hafi reynt að afvegaleiða yngri leikmenn liðsins.

"Einhverjir leikmenn fóru upp á herbergi til Domenech. Þeir grétu og báðust afsökunar á því sem væri að gerast. Það voru yngri leikmenn liðsins. Það eru þrír eða fjórir leikmenn sem leiða þessa uppreisn og munu aldrei spila aftur á HM. Þeir eru William Gallas, Eric Abidal og Thierry Henry sem er vinur Anelka," sagði framkvæmdastjórinn.