Dwight gerir sína hluti og ég geri mína

„Eina ráðið mitt í sambandi við konur er að halda við tvær eða þrjár,“ segir fótboltahetjan Dwight Yorke í viðtali við breska dagblaðið Daily Express.

Yorke hefur reglulega boðið Akureyrarmeyjunni Kristrúnu Ösp Barkardóttur út til sín undanfarin misseri og nú síðast fóru þau í rómantíska siglingu í Karíbahafinu. Ummælin koma ekki illa við Kristrúnu, sem ítrekar að þau séu ekki saman, þrátt fyrir að þau hafi verið að hittast í tvö ár. „Hann hefur ekki hugmynd um hvað ég er að gera þegar við erum ekki saman og ég veit ekki hvað hann er að gera heldur,“ segir hún. „Þó ég myndi ákveða að fara vera með honum og flytja út til hans, þá myndi ég ekki vita það vegna þess að hann ferðast mikið. Ég geri mína hluti og hann gerir sína.“

Dwight Yorke gerði það gott með liðum á borð við Manchester United og Aston Villa á árum áður og var um tíma á meðal fremstu sóknarmanna heims. Kristrún segir að hann sé frábær, enda komi hann afar vel fram við hana. „Við erum alltaf að gera eitthvað skemmtilegt og kynlífið er gott,“ segir hún. „Ég er ekki tilbúin til að fara í samband og byrja að búa með einhverjum. Af hverju ætti ég þá að vera spá í því hvort hann sé með öðrum konum?“

Hvað framtíðin ber í skauti sér verður að koma í ljós segir Kristrún. „Við töluðum mikið saman þegar ég var úti í hjá honum i Englandi í vikunni og hann var að ýta undir að það yrði meira eitthvað meira úr þessu hjá okkur,“ segir hún. - afb