Tveggja daga þrítugsafmæli fyrir Audda

„Ég er svo mikið afmælisbarn að ég verð að halda upp á þessi tímamót með stæl. Þetta verður eins konar fiesta,“ segir Auðunn Blöndal sem á 30 ára afmæli í dag. Auddi er búinn að skipuleggja heljarinnar veislu en hann heldur af stað í óvissuferð í dag með sínum helstu vinum. „Þetta er strákaferð þar sem ég mun fara með vini mína út um allan bæ á eitthvert skrall,“ segir Auddi en hann vill ekki gefa upp hvað sé á dagskránni enda búinn að skipuleggja ferðina í langan tíma. „Ég er sko löngu búinn að biðja strákana um að taka frí í vinnu á morgun svo hægt sé að sletta ærlega úr klaufunum í kvöld.“

Auddi mun ekki láta óvissuferðina á afmælisdaginn duga því hann ætlar að bjóða fjölskyldu sinni, vinum og kunningjum í allsherjar veislu á laugardaginn. Hann er búinn að leigja skemmtistaðinn Square við Lækjartorg fyrir herlegheitin og býst við mörgum gestum. Sveppi og Pétur Jóhann, skemmtikraftar og góðvinir Audda, verða veislustjórar og því má búast við miklu stuði. „Ég vildi hafa þetta svona skipt en á laugardaginn er samt aðalveislan og verður vonandi svaka fjör fyrir alla. Ég verð með skemmtikrafta og hljómsveitir til að skemmta liðinu,“ segir Auðunn en Sverrir Bergmann ætlar að syngja og hann vonast til að Páll Rósinkranz úr Jet Black Joe komist til að taka lagið fyrir sig.

Góður félagi Audda, Egill Gillzenegger, hélt upp á afmælið sitt á dögunum og hefur hann verið tíður gestur í sjónvarpsþáttum Audda og Sveppa í vetur. Mikil spenna hefur ávallt ríkt milli félaganna í þáttunum og því er spurning hvort Auddi ætli sér að toppa afmælishaldi Gillzenegger? „Ja, það verður allavega engin Mercedez Club að troða upp í mínu partíi. Það eru betri líkur á að ég fái Villa Vill og Rúnar Júlíusson til að koma,“ segir Auddi að lokum en hann er nýkominn heim frá Bandaríkjunum þar sem hann og Gillzenegger voru að taka upp sjónvarpsþætti sem eru væntanlegir innan tíðar. - áp