Verkjaði alls staðar

Sex and the City stjarnan, leikkonan Kim Cattral, segir að hana hafi verkjað alls staðar í líkamanum eftir að hún mátaði fötin sem hún klæddist í myndinni SATC II því mátunin tók heila eilífð að hennar mati.

Kim sem fór eftirminnilega með hlutverk Samönthu Jones í ævintýrinu Sex and the City var ekki hrædd við að segja nákvæmlega hvað henni fannst um fötin sem hún átti að klæðast.

„Ég hafði alltaf val þegar kom að fatavali. Það var annaðhvort nei, nei, nei en stundum enduðum við í pattstöðu og ég sagði einfaldlega: Sjáðu þetta er ekki rétt! Þetta passar alls ekki við mig. Allir voru opnir fyrir því hvað mér fannst. Stundum eyddum við 8 klukkustundum í að máta föt. Mig verkjaði alls staðar í líkamanum því ég var klædd úr og í allan tímann," sagði Kim.

„Ég var til dæmis aldrei hrifin af kjólunum sem Charlotte gekk í en það voru þarna nokkrir kjólar og skartgripir sem Carrie notaði sem ég gat hugsað mér að nota," sagði hún.