Snoop eins og reykskrímslið í Lost

Söngkonan Katy Perry kynnir af krafti nýjasta lag sitt, California Gurls, þessa dagana. Með henni í laginu er rapparinn Snoop Dogg og segist hún hafa farið í kleinu þegar þau hittust fyrst.

„Þetta var eiginlega eins og í Lost. Dyrnar opnuðust og inn kom reykskrímslið,“ sagði Katy í viðtali við New York Post. Þarna er hún væntanlega að vísa til grasreykinga Snoop en hann hefur aldrei farið leynt með þær.

Lagið California Gurls þýtur nú upp vinsældalistana víða um heim. Katy samdi lagið eftir að hún heyrði Empire State of Mind með Jay-Z og Aliciu Keyes. „Ég var bara öfundsjúk. New York á svo mörg frábær lög. Ef Notorious B.I.G. eða Tupac væru enn á lífi væru til fleiri góð lög um Kaliforníu.“

Hér á heimasíðu Katy má hlusta á California Gurls.