Myndaði Ísland úr hliðarrúðum hópferðarbíla

Ljósmyndarinn Svavar Jónatansson tók yfir 200.000 myndir á ferðalögum sínum í kringum landið. Hann setti saman tvö myndbönd úr myndunum og hefur gefið þau út á DVD.

„Ég fékk þessa hugmynd upprunalega þegar ég keyrði hringinn í kringum landið á mótorhjóli árið 2004. Á ferðalaginu velti ég fyrir mér myndatöku af landinu og hvernig best væri að framkvæma það. Það var svo ekki fyrr en árið 2007 sem ég sá vöruflutningabíl og datt í hug að nota þá og rútur til að keyra með og taka myndir út um hliðarrúðuna," segir Svavar Jónatansson, 28 ára ljósmyndari.

Svavar gefur út DVD disk nú í vikunni sem sýnir vinnu hans síðastliðin 3 ár. Hann ferðaðist með áætlunarbílum um hringveg 1 og tók myndir út um hliðarrúðuna. Það voru fyrirtækin Austfjarðarleið, Flytjandi, Kask, Landflutningar, Netbus, Sba-Norðurleið og Sterna sem leyfðu Svavari að sitja þessi ár á meðan hann safnaði myndunum. Um er að ræða hátt í 200.000 myndir sem teknar eru á mismunandi árstíðum og í mismunandi veðurfari. Af þessum fjölda hefur hann valið um 40.000 myndir sem hann hefur sett saman í tvö 43 mínútna löng myndbönd ásamt aukaefni og gefið út DVD diski. Hann fékk söngvarann Daníel Ágúst Haraldsson til að semja tónverk sem spilast undir þessari myndrænu keyrslu.

„Myndböndin fela í sér óslitna keyrslu þar sem árstíðaskiptingar og veðurbreytingar eiga sér stað á fáeinum sekúndum," segir Svavar. Í aukaefninu fá sérvaldir staðir á landinu ítarlegri yfirferð og sýnir Svavar breytileika ýmissa kennileita eftir veðri og birtu og má þar nefna Baulu, Esjuna, Vatnajökul, Hafnarfjall, Eyjafjöll og fleiri staði.

Svavar sýndi stækkaðar myndir og hluta úr verkinu á Vetrarhátíðinni á Höfn í Hornafirði en hann vann verkið einmitt þar líka. Í maí var honum, ásamt Daníel Ágústi, boðið að koma með verkið til Winnipeg í Kanada. Verkið fékk mjög góðar viðtökur þar og var þeim sýndur mikill áhugi. Einkum af Vestur-Íslendingum sem þekkja til sögu forfeðra sinna og gátu séð heimahaga þeirra í verkinu. „Það er mjög mikið atriði fyrir mig að sýna verkið hér heima líka og er ég að einbeita mér að því að það verði að raunveruleika," segir Svavar.

Framhaldið hjá Svavari er síðan að mynda þá hluta landsins sem eru ekki á hringveginum eins og til að mynda Snæfellsnes og Reykjanes, en um þessar mundir er hann byrjaður á Snæfellsnesinu. Heimasíða verkefnisins er www.inlandoutland.com þar sem hægt er að sjá myndir Svavars og brot úr myndböndunum.