Setja Faust upp í Young Vic

„Þetta er ein af stóru stundunum,“ segir Gísli Örn Garðarsson en uppfærsla Vesturports og Borgarleikhússins á hinni sígildu sögu um Faust verður fjörutíu ára afmælissýning leikhússins Young Vic í Lundúnum. Leikhúsið er eitt af þeim stóru á Englandi og því er um að ræða feikilegan heiður fyrir Vesturportsfólk. Við taka nú þrotlausar æfingar á verkinu á ensku og verður enskum tungumálakennara flogið til Íslands til að hafa yfirumsjón með tungumálaæfingunum. Sýningin verður á fjölum leikhússins í sex vikur og verður sýnt alla daga vikunnar, alls fjörutíu og tvær sýningar en frumsýnt verður 1. október.

Þessi árangur Vesturports og Borgarleikhússins er ekki síst merkilegur í því ljósi að Young Vic-leikhúsið var stofnað sérstaklega til að gefa ungu listafólki á Bretlandseyjum tækifæri til að koma listsköpun sinni á framfæri og vera með það framsæknasta og frumlegasta sem í gangi er hverju sinni í bresku leikhúslífi. Meðal þeirra sem hafa stigið sín fyrstu skref á fjölum leikhússins eru stórleikarar á borð við Helen Mirren, Judi Dench, Jude Law, Ian McKellen og Clive Owen og þá má til gamans nefna að hin goðsagnakennda rokkgrúppa The Who hélt vikulega tónleika í húsinu til að æfa fyrir upptökur á meistarastykki sínu Who‘s Next. David Lan, leikhússtjóri Young Vic, var viðstaddur frumsýningu Faust hér á landi í janúar og heillaðist af verkinu. „Gísli og Vesturport hafa verið stór hluti af Young Vic undanfarin ár. Okkur þykir mikið til þeirra koma og finnst frábært að fá tækifæri til að vinna með þeim. Ekki skemmir heldur fyrir að áhorfendurnir okkar kunna vel að meta sýningarnar þeirra,“ segir Lan en Vesturport setti upp hina margrómuðu Rómeó og Júlíu í leikhúsinu fyrir átta árum sem vakti mikla athygli. „Við erum því himinlifandi að hafa fengið bæði Vesturport og Borgarleikhúsið til liðs við okkur og Faust verður miðpunkturinn á afmælisdagskránni okkar.“

Gísli segir að þegar menn haldi upp á svona stórafmæli vilji þeir vanda vel til verka. Því hvíli mikil ábyrgð á herðum leikhópsins sem stendur að Faust. „Það sem gerir þetta óvænt er að við erum íslensk og það er alveg sama hversu hart við leggjum að okkur í tungumálinu þá breytir það ekki þeirri staðreynd að við erum íslensk. Maður hefði kannski haldið að þeir myndu setja saman einhverja sýningu með meiri sögulegri skírskotun en þetta sýnir kannski best hversu mikill heiður þetta er fyrir okkur. Maður er bara eiginlega í skýjunum.“

freyrgigja@frettabladid.is