Vill hjónaband og Formúlubarn

Nicole Scherzinger, söngkona The Pussycat Dolls, er tilbúin í barneignir með kærasta sínum, Formúlu-ökuþórnum Lewis Hamilton. Fyrst vill hún samt ganga með honum upp að altarinu.

„Ég er mjög íhaldssöm og vil fylgja hefðinni. Mig langar að giftast áður en við eignumst börn og vonandi verður það að veruleika bráðlega. Lewis er alltaf að segja mér að ég yrði virkilega góð móðir og ég veit að hann yrði frábær faðir. Ég elska börn og ég er tilbúin í þetta,“ sagði Scherzinger, sem er 32 ára. Hún viðurkennir að mörgum finnist þau hreinlega einum of hamingjusöm.

„Hann skipulagði helgarferð til Parísar fyrir tveimur árum. Við gengum um borgina hönd í hönd og snæddum kvöldmat við kertaljós. Fólki fannst þetta eflaust einum of en þetta var mjög rómantískt,“ sagði söngkonan.

Hún bætti við að Lewis ferðist stundum hálfa leið yfir hnöttinn, eingöngu til að hitta hana í eina kvöldstund. „Hann er yndislegur. Hann flýgur til mín yfir hálfa veröldina bara fyrir eina kvöldstund og flýgur síðan til baka til að sinna sínum skyldum.“