Tvær myndir um Airwaves

„Myndin á að vera eins konar heimild um hvernig Airwaves-hátíðin er búin að þróast gegnum árin og hvernig stemningin myndast í kringum hana hjá gestum og tónlistarfólki,“ segir Guðjón Jónsson leikstjóri en hann stendur að heimildarmynd um íslensku tónlistarhátíðina sem verður frumsýnd á Stöð 2 á mánudaginn. Myndin er að sögn Guðjóns hress og skemmtileg.

„Við fléttum saman gömlum upptökum af hátíðunum í gegnum tíðina við viðtöl við þekkta íslenska tónlistarmenn, erlenda blaðamenn og annað bransafólk til að fá þeirra upplifun af Airwaves,“ segir Guðjón en myndin er um hálftíma löng.

„Það er mjög skemmtilegt að rifja upp sögu tónlistarhátíðarinnar frá því að vera í flugskýli árið 1999 með Gus Gus sem aðalnúmerið til dagsins í dag en hátíðin er núna eins konar sena fyrir ný bönd að verða uppgötvuð,“ segir Guðjón en hann vill meina að myndin sýni það hversu mikilvæg hátíðin er fyrir íslenska tónlistarsenu.

Mynd Guðjóns er ekki eina heimildarmyndin sem gerð hefur verið um hátíðina en myndin Where"s the Snow? eftir þá Bowen Staines og Gunnar B. Guðbjörns­son, verður frumsýnd um helgina í tengslum við RIFF-kvikmyndahátíðina.

„Við tókum upp fullt af flottu tónleikaefni, viðtöl við gesti og aðstandendur,“ segir Gunnar B. og bætir við að í myndinni verði spurningunni: „Hvað er eiginlega svona frábært við Icelandic Airwaves?“ svarað. - áp