Fór fram fyrir í iPhone-röð og nördarnir brjáluðust

Gamanleikarinn Jason Bateman náði að reita mikinn fjölda tölvunörda til reiði í síðustu viku þegar hann fékk að fara fram fyrir röð af fólki sem beið fyrir utan Apple verslun til að kaupa nýjasta iPhone 4 símann.

Um tvöþúsund manns biðu í röð fyrir utan verslunina til að geta fest kaup á símanum og sumir höfðu beðið alla nóttina.

„Þetta var fáránlegt. Fólk varð mjög reitt því þetta var út í hött. Hann kom um klukkan fimm um morguninn og beið í röðinni eins og við hin, en um klukkan tíu var hann leiddur inn í verslunina af starfsfólki verslunarinnar," var haft eftir sjónarvotti sem hafði beðið í röð frá því um klukkan þrjú um nóttina.

Bateman segist þó ekki hafa orðið var við reiði viðstaddra og tjáði sig um málið á Twitter-síðu sinni.

„Það baulaði enginn á mig. Það sagði enginn orð. Starfsmaður verslunarinnar sótti mig úr röðinni til að hlífa mér við ljósmyndurum sem þarna stóðu. Ég var sáttur við að bíða í röð. Ég vildi óska að ég hefði beðið áfram í röðinni."