Zac Efron fór í teygjustökk

Leikarinn Zaz Efron reitti yfirmenn sína í kvikmyndabransanum til reiði með því að fara í teygjustökk fram af brú í borginni Vancouver í Kanada.

Efron var í fríi frá tökum á kvikmyndinni Charlie St. Cloud og ákvað að skella sér í teygjustökk að gamni sínu. Leikarinn játar að hafa fengið skömm í hattinn, enda braut hann með uppátækinu samning sem hann hafði undirritað í tengslum við myndina.

„Þetta má maður ekki gera og ég lenti í miklum vandræðum. Þetta var dómgreindarskortur af minni hálfu. Ég hefði ekki átt að fara. Við ákváðum þetta klukkan tvö um nóttina áður en við stukkum.“