Ys og þys á götum Austin

„Þetta gekk stórvel, það var gerður góður rómur að spilamennskunni okkar,” segir Davíð Þór Jónsson tónlistarmaður. Hann spilaði á fernum tónleikum með söngkonunni Ólöfu Arnalds á SWSX-tónlistarhátíðinni í Texas. Davíð segir allt hafa verið krökkt af áhugafólki um góða tónlist en í ár rakst hátíðin á við kvikmyndahátíð sem haldin var vikuna áður og var að ljúka þegar gítarleikarar og aðrir tónlistarmenn hófu innreið sína.

Fjöldi íslenskra tónlistarmanna tróð upp á hátíðinni en auk Ólafar og Davíðs spiluðu Seabear á hátíðinni, Kría Brekkan og svo Steed Lord. „Ég hitti nú eitthvað af þessu liði og þetta var mjög gaman. Þetta er auðvitað fyrst og fremst bransahátíð þar sem allir eru að reyna að koma sér á framfæri,“ segir Davíð en hátt í tvö þúsund tónlistarmenn og hljómsveitir koma fram á þessari hátíð.

Davíð hreifst af Austin og segir þetta ákaflega umburðarlynda borg af Texas-borg að vera. Þarna gangi ekki allir um með kúrekahatt og skammbyssu.

„Karlmenn mega allavega standa þétt saman án þess að vera handteknir fyrir samkynhneigð. Við Mugison spiluðum reyndar á annarri tónlistarhátíð þarna fyrir tveimur árum, um svipað leyti og Ísland hrundi, og hún var miklu afslappaðri. Þetta var svolítið mikill asi.“ -fgg