Friðrik Þór flottur í New York

Íslenska heimildarmyndin A Mother’s Courage eftir Friðrik Þór Friðriksson var frumsýnd í höfuðstöðvum bandaríska sjónvarpsrisans HBO í New York á mánudagskvöldið. Spjallþáttastjórnandinn Rosie O‘Donnell stal eilítið senunni.

Eins og Fréttablaðið hefur greint frá keypti HBO sýningarréttinn að Sólskinsdrengnum og fer myndin í almenna dreifingu í byrjun apríl undir nafninu A Mother‘s Courage: Talking Back to Autism. Fyrirtækið hélt sérstaka viðhafnarsýningu í höfuðstöðvum sínum þar sem bandarískir fjölmiðlar tóku spjallþáttastjórnandann Rosie O‘Donnell tali. Hún kom myndinni í fyrirsagnir allra helstu dægurmálamiðla því hún lýsti því yfir að hún hygðist byrja með nýjan spjallþátt árið 2011.

Kate Winslet sá sér hins vegar ekki fært að mæta en hún er sögumaður í enskri útgáfu myndarinnar. Nýlega var tilkynnt að hún og eiginmaður hennar, Sam Mendes, væru að skilja og í breska blaðinu Daily Mail kom fram að hún væri leið yfir því að geta ekki verið viðstödd þessa viðhafnarfrumsýningu.

„Hún var búin að lofa Friðriki Þór að koma en treysti sér ekki til að horfast í augu við fjölmiðla og svara spurningum um hjónaband sitt,“ hefur Daily Mail eftir heimildarmanni sínum.

freyrgigja@frettabladid.is