Bræður fá aðstoð

Einar Bárðarson og Dr. Gunni eiga tvö ný lög á væntanlegri plötu Hvanndalsbræðra sem kemur líklega í verslanir 20. maí.

„Það var mjög krefjandi og skemmtilegt verkefni að fá lag eftir Einar. Hann lét okkur hafa eitt hressandi lag sem heitir Plöturnar hans pabba. Þetta er eitt af þessum lögum sem við erum að reyna að berja saman í stúdíóinu,“ segir söngvarinn og trommuleikarinn Valur Freyr Halldórsson. Einnig verður á plötunni ska-útgáfa Hvanndalsbræðra af lagi Skriðjökla, Mikki refur, sem naut mikilla vinsælda á níunda áratugnum. Sömuleiðis verður þar Eurovision-lagið Gleði og glens, auk La la-lagsins og Vinkonu, sem bæði fengu góða útvarpsspilun síðasta sumar. „Þetta verður fjölbreyttur diskur. Þarna verður ska, reggí, rokk og popp.

Við stefnum á alvöru sumardisk, hálfgerðan partídisk,“ segir Einar.

Síðasta plata Hvanndalsbræðra, Knúsumst um stund, kom út árið 2008 og seldist í tæpum 3000 eintökum. Hún var gefin út af þeim sjálfum en nýja platan kemur út á vegum Senu. „Við gerðum tveggja platna samning við þá. Við erum mjög sáttir,“ segir hann. - fb